السلام عليكم ورحمة الله وبركاته
مساكم الله بالخير
هذي القصيده للشاعر خالد بن مدعث وقد أعجبتني
أقدمها لكم وأتمنى أن يحوز أختياري على إعجابكم
شريت وجيه ... وبعت وجيه ... وأدوّر وجيه إكـرام
أدوّرهم على عين ٍ نظرهـا فـي الرجـال إيصيـب
ولو آخذ خاتم إسليمان .. وأطلـع للعـرب سـوّام
أبقدر أشري وجيه العرب ... مير القلـوب إصعيـب
وألا يا صاحبي صار إلهجوسي فـي الضلـوع إزحـام
نصتني كنّها اللي قال : خذها مـن يميـن إصحيـب
بعد من شلت ست وعشْر .. مع ست وثلاث أعـوام
أصيح إلراعي الأدباش ... وإلا أهرول إمـع الذيـب
قضى عمري ... نفذ صبري .. تعبت .. وتعْبت الأقدام
أواعزتـي للـي يـدوّر فـي الحـيـاة إذهـيـب
يقولون الفقير اللـي طعامـه ... مـا عليـه إيـدام
وأنا أقول الفقير اللي حياتـه ... مـا بهـا تجريـب
يكفيني نهـار الكـون ... مجـرود ٍ بـدون أكمـام
أحطّه ذخر مـن ختْـل الليـال إمولـدات الغيـب
ويكفيني من الدنيـا ... صـلاه وحجـة ٍ وإصيـام
إتجاوب عن سؤال المنكرين إن مـا قـدرت أجيـب
ويكفيني مـن العالـم ... خـوي ٍ معرفتْـه إوسـام
حما ظهْر الرفيق ... وباسط اليمنـى جميـل وطيـب
يموتون العرب ... والذل ما زاد الذليـل إبـ(عـام )
ورضا العالم ... مثل منوة عقيم ٍ ما يجي لـه صيـب
حبيب الله محمـد مـا رضـا بـه منكـر الإسـلام
أجل وشلون ... لا صرنا بشر ... منّا الذنوب إتشيب
نسينا تسعـة الأشهـر ... نسينـا ظلمـة الأرحـام
نسينا الموت ... والقبر ... ومقر الحور ... والتعذيب
ومشينا العمر نضحك ... والنفوس إتصـارع الآثـام
مساكين ٍ نطيع إبليس .... لو قلنا عليه : ( إيهيـب )
لاضاقنّ الليالـي ... قالـوا إن العيـب فـي الأيـام
وأظن الناس ... هيّ اللي على طول الليالـي عيـب
الأحد 31 مايو 2009, 8:19 am
