السلام عليكم ورحمة الله وبركاته
عزيزي القارئ .. هذه نبذه عن شاعرنا الشيخ / بطيحان بن محمد بن بطي بن منيخر ال سفران (رحمه الله)
وهو من بيت إمارة العجمان المشهود لها بقوة البأس والشكيمه في الحروب عند القبائل في الجزيره العربيه
وكتب عن ذلك عدد من المؤلفين والكتّاب العرب وقد لقبهم / امين الريحاني بـ ( المـــان العـــرب ) ،،
وقد قال شاعرنا رحمه الله في مدح ربعه وقبيلته :
ذولاك ربعـي صفـوة الانجـاب
اللي لهم بالضيـق وردٍ وتصديـر
اللي لهم بالحرب صولات واحساب
لا ثار عج معسكـرات المساميـر
واسأل قبايل نجد لاصرت مرتـاب
اللي تميـز ربحهـا والمخاسيـر
ولد شاعرنا سنة 1331 هجريه في وادي العجمان وبعد ذلك انتقل إلى الرياض في سن السابعه مع والده
حيث أراده ان يتعلم القرآن الكريم وتجويده والاحاديث النبويه والقراءه والكتابه على يد المشايخ في الكتاتيب
وتم له ذلك ثم انتقل مع والده إلى هجرة ( حنيذ ) الواقعه في الوادي ،،،
وفي سنة 1351 هـ امر الملك عبدالعزيز بفتح نجران وكان الشيخ بطيحان من الملبين لدعوة الملك عبدالعزيز وشارك فيها حتى تم فتحها
ثم ذهب إلى الحجاز بصحبة اميرها آنذاك الامير فيصل بن عبدالعزيز رحمه الله وبعدها رجع إلى حنيذ
ومن ثم انظم إلى الملك عبدالعزيز رحمه الله وكان من اخوياه المقربين إلى ان توفى ،،،
ثم انظم إلى الملك سعود بن عبدالعزيز رحمه الله
وكان من صفات شاعرنا فصاحة اللسان وقوة المنطق وأنه لا يخشى لومة لائم في قول الحق ،،،
توفى رحمة الله عليه سنة 1424 هـ عن عمر يناهز 94 عاماً ،،،
وسوف نذكر لكم بعض من قصائد الشيخ / بطيحان بن محمد بن منيخر (رحمه الله) ،،،،
هذه القصيده عن المقانيص وهدة الطير مما له اثر كبير عند الصقّار ، ويسندها على ابن عمه / عبدالله بن نايف العويض ،،،
يقول الشاعر :
يابو فهـد مـا حـلا هـدة الطيـر
حِلّ العصير ولا بعد غابت الشمـس
فارضٍ خلا ما داج فيهـا صقاقيـر
ما داج فيها راعي الجيب والجمس
فـي خايـعٍ متخالـطٍ بالنـواويـر
تلقي الحبارى فيه خمسٍ مع خمس
اطيورنـا فـدع الحـرار المغاتيـر
متعلماتٍ ما تفرقـع مـن اللمـس
يصخرن ما طـار بالجـو تصخيـر
ويقابلنـه قبلـة البـن بالحـمـس
والا ركبنا فـوق زيـن الحناتيـر
نبغي لنا ذكرٍ خذينـاه قبـل امـس
ياما قطعنا من فوقها مـن دعاثيـر
والصيد لو نـازحٍ نرمسـه رمـس
ما حن نحسب للتعـب والمخاسيـر
والراي ما حن ناخذه لا غدى عمس
واللي ورد لابد له مـن مصاديـر
دنياك هذي كلها همس في همـس
وهذه القصيده قالها الشيخ/بطيحان بم منيخر في الخمسينات عندما كان بالمستشفى بالكويت ،،
وجهها لابن عمه الشيخ والفارس المشهور / ناصر بن سرحان بن منيخر ( ابو كروز ) يقول :
يامـن يـودي لبـو كـروز خـط
فيه السلام إعـداد وبـل المخيلـه
ويبشره يومـه شفـوقٍ ومشتـط
إنـي بحمـدالله حالـي جميـلـه
ويبشر اللي لي صديـق ويصفـط
والطيب مـن اربوعنـا والقبيلـه
والا الردي هذاك مـا نيتـي خـط
في خاطره لي شحنـه لـو قليلـه
من عقب ذا يا عيد هجـن تخلفـط
هلهـا جيـاع والنجايـب هزيلـه
نطّاح من هـو دون ربعـه تقلّـط
ومشهـر بالجـوخ يبغـي النفيلـه
شوق الذي قرنه على المتن يمشط
والمسك والعنبـر حشابـه ثليلـه
ريحه زبادٍ وزعفـران إلـى عـط
واحيا عروق القلب وابرى غليلـه
يشدي لعود المـوز يـوم يتعلفـط
لاهبـه النسنـاس مثنـاه ليـلـه
وجدي عليكم وجد من هـو تخمـط
يبغي الرشا واخطاه وعزتـي لـه
او وجد من هو في المضامي تخربط
ضاعت ذلوله والتفق مـع صميلـه
ولولا الحيا ويقال مجنـون لفعـط
فعطة قريص شـاف دمـه وشيلـه
والقلـب كنـه بالقديمـي يشعـط
والعين دايـم فـي سنعكـم تخيلـه
يالله انا طالبـك يامجـري الشـط
ومنجي يوسف بحسـن الوسيلـه
انك تنجـي مـن صوابـه توسـط
متمكـنٍ بـه لـه اسنيـن طويلـه
يازين شوف الروض لا منه عطعط
والنبت بـه متبيـن عقـب سيلـه
فيه الحبـاري رتّـعٍ كنهـا البـط
في خايعٍ راعي الغنـم مـا يجيلـه
من عقب خمسينٍ به الفقـع يلقـط
وللي يـرد الزمـل يمـلا شليلـه
ويا ما حلا لا قالوا الطيـر يربـط
شوف الـدلال مقلطـه بالمسيلـه
تلقـا النـدا فـي مدهـرك يتعبـط
سيلـه جديـد لـه ليـال قليـلـه
ولا عندك الا كل مـا هـو مسلـط
علـى عـدوه والغنـم والجميلـه
ما هو من اللـي بالكـلام يتنطـط
مكالـه الهرجـه خبـاث الدغيلـه
هذا هواي اللي له القلـب ينشـط
مدام باقي الروح مـا جـا عميلـه
دام الفتى في حفرتـه مـا تـورط
والراس ما هالـوا عليـه النثيلـه
وهذه القصيده قالها الشيخ بطيحان بن منيخر وهي حول العيال ومنافعهم لوالدهم وطيب افعالهم
والفرق بين الولد الردي والولد الطيب يقول الشاعر :
الوالد اللـي مـا يخلّـف مشاكيـل
عزي لحاله لا غـدا كنّـه القـوس
مثل الذي يبذر ولا بـه محاصيـل
راحت حياته كلهـا هـم وتعـوس
خطوى الولد مثل الجمل ينقل الشيل
يصبر على حمله ولو حسه حسوس
هـذا لعلـه مـا تجيـه الغرابيـل
وعساه من فجعات الايام محـروس
وخطوى الولد لاهوب صبحٍ ولا ليل
لا فيـه فـودٍ ولا فيـه نـامـوس
اوامره في البيـت زجـرٍ وتنكيـل
ومن الزعل جوفه من الغيظ متروس
كل شي يبيـه مولـمٍ لـه بتعجيـل
ومن والدينه واسرته كنّه منفـوس
مضيعٍ وقتـه مـع سافـل الجيـل
ومن المراجل كنه الجحش مركوس
والكلب ما يطهر ولو دخـل بالنيـل
تراه كلب لا هو بالشـط مغمـوس
لا واهنـي اللـي عيالـه رجاجيـل
يجلون همه لا غدا كنه مضـروس
يقضـون حاجاتـه بليـا مراسيـل
وافعالهم وعلومهم ترفـع الـروس
هذا زمانٍ ما نبـي نكشفـه حيـل
ولاني على عروات الانذال جاسوس
ولا تـرانـي مـاهـرٍ بالتماثـيـل
وعندي لسانٍ قاطعٍ كنـه المـوس
لاشـك مـا ودي نـزود المكاييـل
ونبيّن اللي حدر الاسلاب مدسـوس
حيث المعنـى بيّـن كنـه سهيـل
ما يجهله كون اخرق الفكر مطموس
دنياك هـذه كـل ابيهـا غرابيـل
الشد مايل والهواء غـادي كـوس
ذعذع هواهـا للهمـج والمهابيـل
اللي طبايعهـم خبيثـات ونجـوس
صارت سوى اصقورها والبلابيـل
وسباعها تجفل إلى شافت العـوس
والله مانـي ظالـم كـل حلحـيـل
اللي طريق المرجله راكبـه قـوس
قصدي على اللي يشبهون البراميل
اوادمٍ مير انهـم صـاروا اتيـوس
ولكـل منهـم جثـةٍ كنـه الفيـل
تلقاه من كثر العلف كنـه جامـوس
عقب التصعلـك صايريـنٍ زناقيـل
ومن الهلل ربوا تجـارات وفلـوس
عسى لهم عند الضحى طير بابيـل
ولا حدقوبه فوقهم حاسهـم حـوس
وهذه بعض المرثيات التي قيلت في شاعرنا بعد وفاته رحمه الله :
مرحوم ياشيخٍ ثـوى بالنسيـم
ليلة خميسٍ ودعـوه الجماعـة
قفوا وقالوا في جـوار الكريـم
وداعته اللي ما يخون الوداعـة
وداعة الله يابـن كـل الزعيـم
فرسان نجد أهل الكرم والشجاعة
وداعة الرحمـن يومـه رحيـم
غافر ذنوب اللي رجعله وطاعـة
يالله تمـن وحشتـه ياكـريـم
بجاه الذي ربه عطاه الشفاعـة
وتبدلـه بالأهـل جنـة نعـيـم
في عالي الفردوس تبني شراعه
الشاعرالشيــــخ/محمد بن فهد بن منصور بن منيخر
وهذه قصيده أخرى رثاء في الشيخ بطيحان بن محمد بن منيخر رحمه الله وأسكنه فسيح جناته:
يبكي عليك القلب والشعر يرثيك
بمفرداتـه والقصايـد حزيـنـه
ياأبو بطي حتى المشاعر تعزيـك
فرقاك يا رجل المواعـظ غبينـه
يكرم كريم أخلاق تعطي ويعطيـك
ربٍ وهبك إيمان طيب وسكينـه
وجه الرضى درب التسامح يقديك
فيك الخصال الطيبـات الثمينـه
نذكر مواقيفـك ونبكـي لياليـك
طويت بغيابك شـراع السفينـه
الجود جودك والمبـادي مباديـك
انت الاصول الواضحات المبينـه
انت التقي انت الشدليد تسميـك
فراغك اكبر من حصونٍ حصينـه
مستقبلك حافل على اطلال ماضيك
يالوجه الابيض يا سحاب المدينه
نبكي وندعي لك إلى حل طاريـك
يالله يالمعبـود عبـدك تعيـنـه
هذا اولك يالوقت ينعـاف تاليـك
العين تدمـع والعبايـر سجينـه
الشاعر / ناصر بن كروز بن منيخر
وفي الختام اعذروني على التقصير فهذا ما استطعت ان اجمعه عن شاعرنا رحمه الله
تقبلوا كل الشكر والتقدير
الأحد 31 مايو 2009, 8:54 am
